ShQO-da demalys kúnderi 21 órt oqıǵasy tirkeldi
ÓSKEMEN. QazAqparat – Shyǵys Qazaqstan oblysynda demalys kúnderi 21 órt oqıǵasy tirkelgen, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, órttiń shyǵýynyń negizgi sebepteri – otty qoldanýdaǵy saqtyq sharalarynyń qadaǵalanbaýy, sondaı-aq elektr jabdyqtaryn ornatý jáne paıdalaný kezinde órt qaýipsizdigi erejelerin buzý. Tilsiz jaý faktileri Shemonaıha, Kókpekti, Tarbaǵataı, Kúrshim, Glýbokoe, Aıagóz, Besqaraǵaı, Zaısan aýdandarynda jáne Rıdder qalasynda bolǵan.
«Shemonaıha aýdanynda 3 órt oqıǵasy bolyp, úı, monsha jáne sharýashylyq qora-jaılardy jalyn sharpyǵan. Kúrshimde balalardyń otpen oınaýy saldarynan 2 ret órt shyqty. Jalyn sharpyǵan jalpy aýmaq – 270 sharshy metrdi quraǵan. Órt saldarynan 2 bas mal ólip, 8 tonna shóp otqa orandy. Jalyndy órt sóndirýshiler men Boran orman sharýashylyǵynyń qyzmetkerleri aýyzdyqtaǵan», - dep habarlady vedomstvo ókilderi.
Osy rette TJ departamenti turǵyndardy órt qaýipsizdigi erejelerin qatań saqtaýǵa shaqyrady. Órt shyqqanyn baıqap qalsańyz birden «101» nemese «112» nómirine qońyraý shalyńyz.
