ShQO-da demalys kúnderi 13 órt boldy

ÓSKEMEN. QazAqparat – Shyǵys Qazaqstan oblysynda senbi-jeksenbi kúnderi 13 órt boldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, oblysta ótken demalys kúnderi 5 avtokólik, 5 turǵyn úı, 1 sharýashylyq qora-jaı, vagon men monsha órtengen.

«22 qańtarda Semeı qalasyndaǵy Chaıkovskıı kóshesinde júrip kele jatqan kezinde «Honda Akkord» avtokóliginde órt shyqty. Jalynnyń jalpy aýdany – 1,5 sharshy metrdi quraǵan. Sondaı-aq osy kúni Sátbaev dańǵylyndaǵy kópqabatty turǵyn úıdiń aýlasynda turǵan 1992 jylǵy «Aýdı-80» avtokóligi otqa oranǵan. Motor bólshekteri, salonnyń ishki qaptamasy, aspaptar paneli jandy. Aldyn ala málimet boıynsha órttiń shyǵý sebebi – qaýiptiligi joǵary agregatpen abaısyz jumys isteý», - delingen aqparatta.

Shemonaıha qalasynda jeke turǵyn úıde shyqqan qyzyl jalynnyń jalpy aýdany 35 sharshy metrge jetken. Dáliz ben shatyrdyń aǵash qurylymdary órtendi. Ottyń shyǵýyna – peshti montajdaý jáne ornatý kezinde qaýipsizdik talaptaryn saqtamaý sebep bolýy múmkin.

«Glýbokoe aýdany Tarhanka aýylynda jeke turǵyn úı aýmaǵyndaǵy sharýashylyq qora-jaılarda órt shyqty. Sol jerge shuǵyl kelip jetken órt sóndirýshiler 34 sharshy metr alańdaǵy tilsiz jaýdy tolyqtaı aýyzdyqtaǵan. 23 qańtarda Rıdder qalasynda Zarechnaıa kóshesinde ornalasqan jer úıdiń as bólmesi órtengen. Qabyrǵalar, tereze men esik bloktary, jıhaz jandy. Aldyn ala málimet boıynsha órttiń shyǵýyna – peshti ornatý jáne paıdalaný kezinde qaýipsizdik talaptarynyń saqtalmaýy sebep boldy», - delingen málimette.