ShQO-da daýyl ǵımarattardyń shatyryn ushyrdy, kólikter qar qursaýynan qutqarylýda
ÓSKEMEN. QazAqparat – Shyǵys Qazaqstan oblysynda qatty daýyl birneshe ǵımarat pen turǵyn úılerdiń shatyryn ushyryp áketti, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 20 naýryzda óńirde daýyldy eskertý jarııalanǵan bolatyn. Qatty jel Jarma aýdany Qalbataý aýylynda jalpy aýdany 140 sharshy metrge jetetin ekiqabatty dámhananyń jáne Keldenov kóshesindegi jeke turǵyn úıdiń shatyryn kókke kótergen. Sonymen qatar Áýezov kentindegi Mıra kóshesinde ornalasqan, jer úıdiń shatyry buzyldy.
«Qazirgi ýaqytta oqıǵa ornynda komıssııa músheleri jumys isteýde. Zardap shekken eshkim joq», - dep habarlady vedomstvo ókilderi.
Osy rette, TJD mamandary óńir jurtshylyǵyna qandaı da bir qıyndyqqa tap bolǵan jaǵdaıda dereý «112» nómirine habarlasý qajettigin eskertedi.
Sondaı-aq Shyǵys Qazaqstan oblysynyń qutqarýshylary jolda qalǵan kólik júrgizýshilerine kómekke kelýde.
Tarbaǵataı aýdanyndaǵy Zaısan kólinde 3 balyqshy evakýatsııalandy. Belgili bolǵandaı, «Ultaraq» ýchaskesinde olardyń kólikteri buzylyp qalǵan. Qutqarýshylar azamattardy jol talǵamaıtyn kólikpen Qabanbaı aýylyndaǵy qonaq úıge jetkizip tastady.
«Úrjar aýdanyndaǵy «Maqanshy-Jalańashkól» tasjolynda avtokólikter qar qursaýynda qalǵan. Oqıǵa ornyna kelip jetken qutqarýshylar 2 kólikti jolǵa súırep shyǵardy. 6 adam, onyń ishinde 2 bala evakýatsııalandy. Kúrshim aýdany Qaıyńdy aýylynyń mańaıyndaǵy Buqtyrma sý qoımasynda, dál muzdyń ústinde 2 balyqshy minip kele jatqan kólik synyp qalǵan. TJD qyzmetkerleri oqıǵa ornyna «KÝNG» tehnıkasymen kómekke attandy», - delingen málimette.
«Semeı Qaraýyl» tasjolynan 30 shaqyrymdaı jerde qutqarýshylar júrgizýshiler men jolaýshylarǵa kómek kórsetip jatyr. Aldyn ala málimetke sáıkes, munda 80 kólik jolda qalǵan. «OblShyǵysjol» JShS mamandary men qutqarýshylar qar basqan joldy tazalap, kólikterdi Semeı qalasyna deıin jetkizip tastamaq.
Sonymen qatar Jarma aýdanyndaǵy «Shar-Baqyrshyq» tasjolynda 4 kólik qarǵa batqan. Qazirgi ýaqytta sol jerge jol tazalaıtyn arnaıy tehnıkalar bara jatyr.
Esterińizge sala ketsek, osyǵan deıin ShQO-da qatty jel qus fabrıkasynyń shatyryn ushyryp áketkendigin habarlaǵan bolatynbyz.
