ShQO-da daýyldan úılerdiń shatyry ushyp, kósheler jaryqsyz qaldy
ÓSKEMEN. KAZINFORM – Shyǵys Qazaqstan oblysy Samar aýdanynda qatty jel soqty.
Kesheli beri Samar aýdanynda daýyl soǵyp jatyr. Meteorologtardyń málimetinshe, jeldiń ekpini sekýndyna 25 metrge deıin jetken. Abyroı bolǵanda, zardap shekken eshkim joq.
- Daýyl saldarynan birneshe kópqabatty turǵyn úı men aýyl sharýashylyǵyna arnalǵan jeke qurylystardyń shatyryna zaqym keldi. Sonymen qatar elektr berý jelileri men baılanys baǵandary qulaǵan, - deıdi aýdan ákimi Serik Jeńisov.
Oqıǵa ornyna birden Tótenshe jaǵdaılar departamentiniń jedel brıgadalary, jergilikti atqarýshy organdardyń qyzmetkerleri jáne «ShQ OESK» AQ men «Qazaqtelekom» AQ mamandary jumyldyryldy. Qalpyna keltirý jumystary júrgizilip, búgin eldi mekenderde elektr qýaty tolyq qalpyna keltiriledi dep josparlanyp otyr.
- Búlingen shatyrlarǵa qatysty jaqyn kúnderi tıisti qaýly qabyldanady. Qazir kelgen shyǵyn kólemi eseptelip jatyr. Qurylys materıaldaryn Óskemennen jetkizý jumystary bastalyp ketti, - deıdi Serik Jeńisov.
Eske salsaq, osyǵan deıin daýyl kezinde qaza tapqan aqsýlyq áıeldiń otbasyna kómek kórsetilgeni habarlanǵan.