ShQO-da daryndy balalarǵa arnalǵan mektep ashylady

ÓSKEMEN. QazAqparat – Óskemen qalasynda qaraýsyz qalǵan ǵımarat ornynda daryndy balalarǵa arnalǵan mektep ashylady, dep habarlaıdy QazAqparat tilshisi.
None

ShQO ákimdiginiń málimetine súıensek, Óskemende daryndy balalarǵa arnalǵan mektep boı kóteredi.

«Bilim salasynda úlken joba iske qosyldy. Jibek matalar kombınaty shaǵynaýdanyndaǵy qurylysy aıaqtalmaǵan nysan kóptiń esinde. Bastapqy joba boıynsha QR Oqý-aǵartý mınıstrligi onda mashına jasaý kolledjin salýdy josparlaǵan. Alaıda joba aıaqtalǵan joq. Sóıtip ǵımarat uzaq ýaqyt boıy qaraýsyz qaldy», - dedi aımaq basshysy Danıal Ahmetov.

Qazirgi ýaqytta atalmysh nysan oblys ákimdiginiń balansyna berildi. Jaqyn arada munda fızıka, matematıka, ınformatıka jáne basqa da naqty ǵylymdardaǵy daryndy balalarǵa arnalǵan 900 oryndyq mektep salynbaq.

«Sondaı-aq bul jerde ShQO-nyń basqa aýdandarynan kelgen balalarǵa arnalǵan 160 oryndyq ınternat qarastyrylǵan. Oqý úrdisine myqty professorlyq-oqytýshylyq quram tartylatyn bolady. Pedagogtar úshin de jaıly jataqhana salý kózdelip otyr. Oqý orny el Prezıdenti Qasym-Jomart Toqaevtyń bastamasymen qolǵa alynǵan «Jaıly mektep« jobasyna tolyq sáıkes keledi. Kabınetter barlyq standarttar boıynsha jabdyqtalady. 300 oryndyq úlken sportzal, basseın jáne ashana bolady. Qazir qurylysshylar barlyq saqtalǵan qurylystardyń jaramdylyǵyna saraptama júrgizedi. Joba tolyǵymen qaýipsiz bolýy shart», - dedi ákim.

Sonymen qatar jaqyn arada qarqyndy damyp kele jatqan Jibek matalar kombınaty shaǵyn aýdanynda 600 oryndyq taǵy bir mekteptiń qurylysy bastalady. Budan bólek, óńir basshysy quzyrly basqarma mamandaryna osy shaǵyn aýdandaǵy qurylysy aıaqtalmaǵan balabaqsha ǵımaratyna qatysty jumys isteýdi tapsyrdy. Jeke menshik ıesine nysandy aıaqtaý úshin tıisti baǵyt beriledi.

Aıta keteıik, «Jaıly mektep» ulttyq jobasy aıasynda óńir boıynsha 7800 oryndyq 15 bilim ordasy boı kóteredi. Qazirdiń ózinde Óskemendegi «Nurly jol» shaǵyn aýdanynda jáne Zaısan aýdanynda salynyp jatqan mektepterdiń qurylysy aıaqtalýǵa jaqyn.


Сейчас читают