ShQO-da dárigerdi aýrýhanada atyp ketti
ÓSKEMEN. QazAqparat - Shyǵys Qazaqstan oblysy Tarbaǵataı aýdanynyń ortalyǵy Aqjar aýylynda feldsherdi túngi kezekte júrgen jerinen atyp ketti, dep habarlaıdy QazAqparat tilshisi.
Oqıǵa 15 aqpan kúni bolǵan. Túngi saǵat 3:10-da túngi kezegin ótkizip jatqan Rýstam Rıshatulyn betperde kıgen adam atyp ketedi. Polıtsııa qyzmetkerleri qylmystyń izin sýytpaı, kúdiktini tutqyndaǵan.
«Qylmysqa qatysty zattaı dáleldiń bári alyndy. Betperde, myltyq pen qylmys kezinde kıgen kúrte saqtaýly tur. Kúdikti de Aqjar aýylynyń týmasy. 1974 jyly týǵan. Aýyr qylmys bolǵandyqtan, oblystyq sotqa joldaımyz. Ázirge tergeý júrgizilip jatyr. Onyń ózi 1-1,5 aı ýaqyt alýy múmkin» - deıdi Tarbaǵataı aýdandyq ishki ister bóliminiń Aqjar polıtsııa bólimi basshysy Talǵat Nurmuhanbetov.
Qaza bolǵan feldsher 1989 jyly týǵany belgili bolyp otyr. Úıinde ata-anasy men aıaǵy aýyr áıeli qalǵan.
