ShQO-da dárigerge jala japqan zeınetker sottaldy
ÓSKEMEN. KAZINFORM — Shyǵys Qazaqstan oblysy Tarbaǵataı aýdanynda dárigerge jala japqan zeınetkerge qatysty sot isi qaraldy.
Aýdandyq sottyń málimetinshe, aýyl turǵyny WhatsApp messendjerindegi topta Tarbaǵataı aýdandyq aýrýhananyń bas dárigeriniń ar-namysy men qadir-qasıetine nuqsan keltiretin jalǵan aqparat taratqan.
Sot barysynda áıel adam óz kinásin moıyndamady. Al dáriger aıyptalýshyǵa qatań jaza taǵaıyndaýdy surady.
— Sot jaýapkerdi ÁQBtK-niń 73-3-baby 2-bóligi boıynsha ákimshilik quqyq buzýshylyq jasaǵany úshin kináli dep tanyp, onyń zeınetker ekenin eskere otyryp, aıyppul mólsherin 30 paıyzǵa tómendetti. Nátıjesinde aýyl turǵyny 495 432 teńge kóleminde aıyppul tóleýge mindetteldi, — dep habarlady sottyń baspasóz qyzmetinen.
Eske salsaq, osyǵan deıin medıtsına qyzmetkerlerine kúsh qoldanǵandar 12 jylǵa deıin sottalatyndyǵy habarlanǵan.