ShQO-da dáriger tapshy: Turǵyndar em alý qıyndap ketkenine shaǵymdandy
ÓSKEMEN. KAZINFORM — Shyǵys Qazaqstannyń keıbir aýdandarynda dáriger tapshylyǵy bas qatyryp, baltyr syzdatar máselege aınaldy. Sonyń saldarynan turǵyndar durys em-dom ala almaı júrgenine shaǵymdanyp jatyr. Kazinform tilshisi túıini tarqatylmaı kele jatqan túıtkildiń jaı-japsaryn anyqtap kórdi.
Oblys boıynsha dáriger jetispeıtinin ShQO densaýlyq saqtaý basqarmasynyń ókilderi de jasyrmaıdy.
Statıstıkaǵa súıensek, 2025 jyldyń sáýir aıynyń ortasyndaǵy jaǵdaı boıynsha Shyǵys Qazaqstanǵa 160 dáriger qajet bolǵan. Keıinirek jaǵdaıdyń biraz rettelgenine qaramastan kúz bastalǵaly 153 aq halatty jetispeıtini aıtyldy.
Onyń ishinde, jalpy tájirıbelik dárigeri Óskemennen bólek, barlyq aýdanǵa qajet. Densaýlyq saqtaý basqarmasy basshysynyń orynbasary Madına Myrzabekova osy túıtkildi sheshý joldary qarastyrylyp jatqanyn alǵa tartty.
«Biz ekologııalyq aımaqqa kiremiz»
Máselen, Tarbaǵataı aýdanynyń turǵyndary ýaqyt ótken saıyn jaǵdaı ýshyǵyp bara jatqanyn aıtyp otyr. Tuǵyl aýylynyń jurty «aýylda dáriger joq» degeli birneshe jyldyń júzi bolǵan.
Zeınetker Almıra Qurmanbekqyzynyń aıtýynsha, mundaǵy halyq balyq aýlap kúneltedi. Alpys jyl osy aýyldyń turǵyny bolǵan ol osy ýaqytqa deıin túrli ózgeristiń kýási bolǵan.
Zeınetker qazir 5000-ǵa tarta halqy bar eldi mekende dáriger jetispeıtinin jetkizdi. Oǵan qosa, úsh jyldan beri zeınetke shyqqan adamnyń áli de jastarǵa oryn bermeı júrgenine narazylyq bildirdi.
— Bizge dárigerler kelse eken. Al zeınet jasyndaǵy dáriger eńbek demalysyna ketip, ornyna jas mamannyń kelgeni jón. Memleketimizdiń basty baılyǵy — halyq jáne onyń densaýlyǵy. Sol densaýlyqty saqtaý úshin aýylymyzǵa bilikti dárigerler kerek, — dedi ol.
Aýylda nege dáriger az?
Aýdan ákiminiń orynbasary Erjan Sabyrbaev «Aýylda dáriger nege joq?» degen saýalymyzǵa aq halattylardyń áralýan sebeppen jumystan shyqqanyn aıtady. Aıtalyq, bıyl qazan aıynyń 1-nen bastap ambýlatorııa dárigeri Áıgerim Asanova óz ótinishi negizinde jumystan ketken.
Jýyqta el arasynda Altaı aýdanyna qarasty Serebrıansk qalasynda hırýrgııa bólimi dál osy maman tapshylyǵyna baılanysty jabylýǵa shaq degen áńgimeler de taraǵan bolatyn. Alaıda keıinnen bul aqparattyń shyndyqqa janaspaıtyny málim etildi.
Osyndaıda kókeıge keletin zańdy suraq — dáriger nege turaqtamaıdy, olarǵa jaǵdaı jasalyp jatyr ma? Bul suraqtardy jýyqta on aıdy qorytyndylap, Óskemende brıfıng ótkizgen birneshe aýdan basshysyna qoıǵan edik.
Olardyń aıtýynsha, jumys isteýge kelgen árbirin qoldaýǵa daıyn.
— Bıyl aýylǵa qansha jas dáriger kelgenin naqty aıta almaımyn. Biraq aýdanymyzda ashylǵan medıtsınalyq nysandardyń barlyǵy dárigerlermen qamtylǵan. Eger jas maman keletin bolsa, olarǵa bıýdjettik nesıe men kóterme járdemaqy jaǵynan kómektesemiz. Sosyn úımen qamtımyz, — dedi Glýbokoe aýdanynyń basshysy Eldar Týmashınov.
Samar aýdanynyń ákimi Serik Jeńisov jaǵdaı sál de bolsyn rettelip kele jatqanyn jetkizdi. Qazir Mırolıýbovka aýylynda quny 196,3 mln teńge bolatyn feldsherlik-akýsherlik pýnkttiń qurylysy jalǵasyp jatyr.
— Aýdanda endokrınologııa, jalpy praktıka, pedıatrııa-neonatologııa jáne rentgenologııa baǵyttary boıynsha dáriger tapshylyǵy azaıdy, — dedi ol.
Qalaı desek te, qazir oblys kóleminde 150-ge tarta dáriger tapshylyǵy sezilip otyr. Al maqala basynda jazylǵan Tuǵyl aýylynda jaǵdaı áli ózgerissiz.
Aýyl turǵyny Názıpa Keshýbaevanyń aıtýynsha, Qabanbaı aýylynan keletin maman aptasyna eki ret, tańerteń saǵat 9:00-den keshki saǵat 16:00-ge deıin jumys isteıdi.
Qazir aýrýhanada kúrdeli jóndeý júrip jatqandyqtan turǵyndar ákimdik artyndaǵy halyqqa qyzmet kórsetý ortalyǵy ǵımaratynda em alyp júr.
— Qan tapsyrsaq ta, dárigerge qaralsaq ta, 60 shaqyrym jol júrip, Aqjarǵa baramyz. Avtobýs júrmeıdi, taksı baryp-qaıtqany úshin kisi basyna 3000 teńge suraıdy. Halyq eki ortada tıtyqtap bitti. 4000 turǵyn ishinde jaǵdaıy tómender adamdar bar, — dedi qazirgi ahýalǵa qapaly bolǵan zeınetker.
Eske salsaq, osyǵan deıin ShQO-da naýqasty durys emdemegen dáriger sottalǵany habarlanǵan.