ShQO-da dalaǵa qoqys tastaǵany úshin 4 myńǵa jýyq adam jaýapqa tartyldy

ÓSKEMEN. KAZINFORM – Shyǵys Qazaqstan oblysynda jyl basynan beri dalaǵa qoqys tastaýǵa qatysty 3855 zańbuzýshylyq tirkelgen.

ShQO Polıtsııa departamentiniń málimetine súıensek, 2450 adam ÁQBtK-niń 505-baby (Abattandyrý erejelerin buzý) boıynsha, al 1405 adam 434-babymen (Qoǵamdyq oryndardy lastaǵany úshin) ákimshilik jaýapkershilikke tartylǵan.

— Osy jyldyń 13 naýryzynan bastap ruqsat etilmegen jerlerge qoqys tastaǵany úshin aıyppul mólsheri ulǵaıtyldy. Endi qoqysty belgilenbegen oryndarǵa tastaǵan jeke tulǵalarǵa 100 AEK kóleminde aıyppul salynady. Bul 393 200 teńge, — dep habarlady oblystyq Tabıǵat qorǵaý prokýratýrasynan.

Kásipkerler úshin jaza odan da qatań. Naqty aıtqanda:

— shaǵyn bıznes sýbektileri men laýazymdy tulǵalarǵa — 200 AEK (786 400 teńge);
— orta bızneske — 500 AEK (1 966 000 teńge);
iri kásiporyndarǵa — 1 000 AEK (3 932 000 teńge).

— Biz zańbuzýshylyqtardy júıeli túrde baqylap otyramyz. Qoqys ormandarda, qala shetinde, jol boıynda jıi tógilip jatady. Zańǵa sáıkes, qoqys tógilgen kez kelgen ruqsat etilmegen jer — «stıhııalyq qoqys alańy» bolyp esepteledi, — delingen aqparatta.

Óńirde tazalyqty baqylaý kúsheıtilgenimen, mamandar bul máseleni sheshý úshin turǵyndardyń ekologııalyq sanasy men jaýapkershiligi asa mańyzdy ekenin aıtty.

Eske salsaq, osyǵan deıin aýyl mektebiniń oqýshylary qorshaǵan ortany tazartýǵa arnalǵan robot qurastyrǵany habarlanǵan.