ShQO-da dala órtiniń aldyn alý úshin 44 mobıldi top quryldy
ÓSKEMEN. QazAqparat – Shyǵys Qazaqstan oblysynda dala órtiniń aldyn alý úshin 44 mobıldi top quryldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, óńir aýmaǵynda ótken demalys kúnderi 150-den astam ret shóp órtendi. Tilsiz jaýdyń aldyn alý úshin qutqarýshylar reıd júrgizýde. Bul maqsatta 312 mamannan turatyn 44 mobıldi top qurylǵan.
«Semeıdegi Mırnyı saıajaı qaýymdastyǵy aýmaǵyndaǵy 8 úı men 6 sharýashylyqtyń qora-jaıy órtengen. Órt sóndirýshiler jalpy aýdany 1000 sharshy metrdi quraǵan jalyndy aýyzdyqtady. Barlyǵy 40 adam men 11 tehnıka jumyldyrylǵan. Al Ulan aýdany Asýbulaq aýylynda shóp janyp, ot 4 jer úı men 3 garajǵa tarady. Kóp uzamaı aýmaǵy 400 sharshy metrge jetken órt óshirildi. Jalyn qoqys jaǵý kezinde qaýipsizdik talaptarynyń saqtalmaýynan shyqqan», - delingen aqparatta.
Bıyl TJD qyzmetkerleri 20 profılaktıkalyq reıd júrgizdi. Nátıjesinde, dalada shóp órtegen 2 adam ákimshilik jaýapkershilikke tartyldy.
Esterińizge sala ketsek, osyǵan deıin Semeıde qutqarýshylar otqa oranǵan úıden múgedek adamdy alyp shyqqanyn habarlaǵan edik.
