ShQO-da dala órtiniń aldyn alý úshin 200-den astam adamnan turatyn mobıldi toptar quryldy
ShQO Tótenshe jaǵdaılar departamenti baspasóz qyzmetiniń málimetine súıensek, óńirdegi órt sóndirý bólimsheleri kúsheıtilgen rejımde jumys isteýde. Qazirgi ýaqytta shóp pen qoqys janýy jıilep ketken.
Órt kóp jaǵdaıda ashyq aýmaqta, saıajaılarda jáne jeke turǵyn úı sektorynda tirkelip jatyr. Otpen abaısyz áreket etý – tilsiz jaýdyń shyǵýyna ákelip soǵatyn eń negizgi sebep.
«Shyǵys Qazaqstanda dala órtiniń aldyn alý úshin 225 adamnan turatyn mobıldi top quryldy. Olardyń qataryna órt sóndirýshiler, jergilikti atqarýshy organdar, polıtseıler men ormanshylar kirdi. Búginde birneshe profılaktıkalyq reıd júrgizgen mobıldi top músheleri órt qaýipsizdigi erejelerin saqtamaǵan 7 adamdy ákimshilik jaýapqa tartty», - delingen aqparatta.
Aıta keteıik, qutqarýshylar dala órtin der kezinde aýyzdyqtaý úshin ǵarysh arqyly da monıtorıng jasaýda. Sonyń kómegimen 9 jylý núktesi anyqtalyp, órttiń ary qaraı jaıylýyna jol berilmedi.