ShQO-da dala órtiniń 46 paıyzy turǵyndardyń abaısyzdyǵynan shyǵady
ÓSKEMEN. QazAqparat – Shyǵys Qazaqstan oblysynda dala órti jıilip ketti, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, óńirde bir kún ishinde 11 ret shóp janǵan. Naqty aıtqanda, Rıdder qalasynda tilsiz jaý 3 sharshy metr, Jarma aýdanynda 140 sharshy metr, Ulan aýdanynda 10 gektar, Besqaraǵaı aýdanynda 2 gektar, Altaı qalasynda 200 sharshy metr aýmaqty sharpydy.
«Órt qaýpi joǵary kezeń bastalǵaly beri aımaqta jalpy aýdany 616 gektar shóp janǵan. Qyzyl jalynnyń shyǵýyna negizinen – turǵyndardyń otty abaısyz paıdalanýy sebep. Statıstıka kórsetkendeı, barlyq órtterdiń 46%-y órt qaýipsizdigi erejelerin bilmeıtin nemese jaýapsyzdyq tanytqan turǵyndardyń kinásinen týyndaıdy», - dep habarlady vedomstvo ókilderi.
Aıta keteıik, qurǵaq shópti jaǵý kezinde órt qaýipsizdigi erejelerin saqtamaǵandarǵa QRÁkimshilik quqyq buzýshylyq týraly Kodeksiniń 336, 367, 410-baptary boıynsha ákimshilik jaýapkershilik qarastyrylǵan.
«Qazirgi ýaqytta oblys boıynsha ÁQBtK-niń 336-babyna sáıkes 64 azamatqa eskertý jasaldy. Jaǵdaıdy baqylaý úshin qalalyq TJB mamandary ushqyshsyz ushý apparatyn paıdalanýda. Dronnyń arqasynda 200 metr bıiktikte baqylaý júrgizip, órt qaýipsizdigi erejeleri buzylǵan ýchaskeni tez anyqtaýǵa bolady», - delingen aqparatta.
