ShQO-da dala órtin sóndirýge kómektesken 4 oqýshy marapattaldy

ÓSKEMEN. QazAqparat – Shyǵys Qazaqstan oblysynda Shemonaıha aýdanynda dala órtin sóndirýge kómektesken oqýshylar marapattaldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, 2 qyrkúıekte Rýlıha aýylynda shóp pen qoqys órtendi. Tilsiz jaý jalpy aýdany 200 sharshy metr jerdi sharpydy.

«Oqıǵa ornyna órt sóndirý beketiniń qyzmetkerleri shuǵyl kelip jetti. Sondaı-aq olarǵa sol mańdaǵy I.Astafeva atyndaǵy orta mektep oqýshylary Alan Abıýrov, Ramıl Shevchenko, Artem Fılıppov jáne Anastasııa Fılıppova kómekke umtylǵan. Olar órtti óshirýge arnalǵan shartyldaqty alyp, qyzyl jalynmen kúresti. Kóp uzamaı ot tolyqtaı aýyzdyqtalǵan», - delingen aqparatta.

6 qyrkúıek kúni TJD qutqarýshylary mektep oqýshylaryn marapattap, alǵys hattar men syılyqtar tabys etti. Saltanatty sharada karantındik talaptar qatań saqtaldy.