ShQO-da dala órtin sóndirý kezinde tutastaı janyp ketken kólik tabyldy
ÓSKEMEN. QazAqparat - ShQO-da órt sóndirýshiler Jaryq aýyldyq okrýgindegi dala órti oryn alǵan jerde tutastaı janyp ketken avtokólikti tabyldy.
Óńirdegi Tarbaǵataı jáne Jarma aýdandarynda birinshi dala órtteri tirkeldi. Túske deıingi ýaqytta Tarbaǵataı aýdanyndaǵy tilsiz jaý aýyzdyqtaldy. Órt aýmaǵy 50 gektarǵa jýyq jerdi qamtydy. Ony sóndirýge ShQO TJD «Órt sóndirý jáne avarııalyq-qutqarý jumystary qyzmeti» memlekettik mekemesiniń 21 qyzmetkeri jáne erikti órt sóndirý quramasynan 53 adam tartyldy.
Sonymen qatar Jaryq aýylynda qyzyl jalynmen kúres júrgizildi. Bul jerde 100-ge jýyq adam jumyldyryldy, onyń ishinde 90-y eriktiler. Shamamen bul aýmaqta tilsiz jaý 100 gektar jerge taraldy.
Belgili bolǵandaı, osy jerde órt sóndirý kezinde tolyqtaı janyp ketken avtokólik tabyldy. Qazirgi kezde órt sebepteri anyqtalýda.
Atap aıtqanda, tek úsh kúnniń ishinde óńirdiń órt sóndirý bólimsheleri 16 ret dala órtin sóndirýge bardy. Negizinen ashyq alańdardaǵy qurǵap ketken shóptesin jer janýda.
Osy rette órt sóndirýshiler arnaıy kólikke sý toltyrýǵa baratyn oryndardyń qashyqtyǵy qıyndyq týyndatyp otyrǵanyn atap ótýde.
