ShQO-da COVID-19-ǵa qarsy vaktsınanyń ekinshi dozasy egilýde
ÓSKEMEN. QazAqparat – Shyǵys Qazaqstan oblysynda koronavırýsqa qarsy qarsy vaktsınanyń ekinshi dozasyn egý bastaldy, dep habarlaıdy QazAqparat tilshisi.
1 aqpannan bastap elimizde koronavırýsqa qarsy reseılik «Spýtnık V» vaktsınasyn erikti túrde salý naýqany bastalǵan. Eki komponentti preparat 21 kún aralyqpen egiledi. Shyǵys Qazaqstanda 1300 adam koronavırýsqa qarsy ekpe aldy. Olardyń eshqaısynda asqyný belgileri bolǵan joq. Búginnen bastap medıtsına qyzmetkerleri ekinshi dozany egýde.
«Biz alǵashqy ekpe alǵandardyń qatarynda boldyq. Ózimde janama áserler bolmady, temperatýra kóterilmedi. Qazir vaktsınanyń ekinshi dozasyn aldym. Eń bastysy - endi koronavırýs ınfektsııasynan qorǵana alatyn sezinemin. Biz medıtsına qyzmetkerleri únemi qaýip ústinde júremiz. Sondyqtan Semeı qalasynyń Perınataldyq ortalyǵy qyzmetkerleriniń 75%-y vaktsına aldy, - deıdi atalǵan ortalyq dırektory Arkat Daırbekov.
Revaktsınatsııa júrgizý úshin ShQO-ǵa 1300 doza vaktsına jetkizildi (Óskemen qalasynda-650, Semeı qalasynda-650). Oblystyq Ana men bala ortalyǵynyń ýchaskelik terapevtik bóliminiń meńgerýshisi Aqbópe Tursynbekovanyń aıtýynsha, vaktsına alǵan dárigerler dene qyzýy 38 gradýstan asqan jaǵdaıda ýaqytsha eńbekke jaramsyzdyq paraǵyn asha alady.
«Mende alǵash ret ınektsııa ornynda azdap bulshyqet aýyrýy sezildi. Keıbir qyzmetkerlerdiń dene qyzýy kóterildi. Barlyq osy belgiler 1-3 kún ishinde joq boldy. Jalpy dárigerlerdiń jaǵdaıy qalypty. Bolashaqta barlyq áriptesterimizdi vaktsına alýǵa shaqyramyz», - dedi ol.
