ShQO-da burynǵy aýdan ortalyqtaryn damytý úshin keshendi baǵdarlama ázirlendi
ÓSKEMEN. QazAqparat – Shyǵys Qazaqstan oblysynda burynǵy aýdan ortalyqtaryn damytý úshin keshendi baǵdarlama júzege asyrylady, dep habarlaıdy QazAqparat tilshisi aımaq basshysy Danıal Ahmetovtiń Instagram jelisine silteme jasap.
«Oblystaǵy burynǵy 13 aýdan ortalyǵyn damytý jónindegi keshendi josparlardy iske asyrý bastalady. Bul maqsatqa qarjylandyrýdyń barlyq kózderinen, sonyń ishinde jeke ınvestıtsııalardan, respýblıkalyq jáne oblystyq bıýdjetterden 64 mıllıard teńge qarastyrylǵan. Eń bastysy, josparlanǵan barlyq jobalar rettilik boıynsha qarastyrylýy qajet. Máselen, jaqynda Tavrııa aýylynda jumys saparymen boldym. Onda mektep pen aýrýhananyń jylý júıesinde birqatar másele bar ekeni anyqtaldy. Tórt qazandyqtyń ekeýi ǵana jumys isteıdi. Sondyqtan qazandyqtardy jóndeý jumysy basymdyqta bolýy tıis», - dedi oblys ákimi.
Onyń aıtýynsha, árbir aýdan ákimi jergilikti jerdiń jaǵdaıyn egjeı-tegjeıli zerdelep, qandaı da bir jobalardyń maqsattylyǵy men mańyzdylyǵyn baǵalaýy tıis. Osyǵan sáıkes, keshendi jospar ázirlenedi. Ár keshendi jospar qarastyrylǵannan keıin ǵana qarajat bólinedi. Óıtkeni ár ınvestıtsııa ózin-ózi aqtaýy kerek.
«Sonymen qatar bıyl Serebrıansk qalasyndaǵy beıorganıkalyq óndiris zaýytyna tıesili ákimshilik ǵımaratta mádenıet úıin, sport jáne áleýmettik nysandardy kóshiremiz. Tek atalǵan shahardy damytýǵa 8 mıllıard teńge bólingen. Bıyl sonyń 2,9 mıllıard teńgesi qalany damytýǵa baǵyttalady», - dedi Danıal Ahmetov.
Budan bólek, Shar aýylynda mektep pen aýrýhana jóndeledi. Qaınar aýylynda dene shynyqtyrý jáne saýyqtyrý kesheni salynyp, mektep pen sport zalynyń shatyry jańartylady.
«Bul josparlanǵan jobalardyń az ǵana bóligi. Barlyq burynǵy aýdan ortalyqtary sapaly aýyzsýmen jabdyqtalady. Turǵyn úı qurylysy, áleýmettik sala, densaýlyq saqtaý, buqaralyq sport jáne mádenıet salasyn damytý da kózdelgen. Árbir joba meniń jeke baqylaýymda bolady», - dedi aımaq basshysy.
