ShQO-da burynǵy aýdan ortalyqtaryn damytý baǵdarlamasy qalaı iske asyp jatyr
Muqtaj jandar baspanamen qamtylady
ShQO ákimdiginiń málimetine súıensek, Altaı aýdany Serebrıansk qalasynyń turǵyndary úshin jyl sońynda jańa dene shynyqtyrý-saýyqtyrý ortalyǵy boı kótermek.
Nysan shahar ortalyǵynda salynyp jatyr. Bul jerde sporttyń ár túrine arnalǵan jabyq alańdarmen qatar fýtbol alańy da bolady.
Al Serebrıansk beıorganıkalyq óndiris zaýytynyń burynǵy ákimshilik ǵımaraty mádenı ortalyqqa aınalady.
Saraptama atalmysh obektiniń jaqsy jaǵdaıda ekenin kórsetti.
Kúrdeli jóndeý júrgizilip, qajetti jabdyqtar alynǵannan keıin munda mýzyka mektebi men úıirmeler ornalasady, kontsert zaly, shyǵarmashylyq jáne qoldanbaly ónerge arnalǵan alańdar bolady.
Kezekte turǵan kópbalaly otbasylar, muǵalimder men dárigerler úshin burynǵy jataqhana ǵımaraty men 60 páterlik turǵyn úı jóndeýden ótedi.
«Birqabatty Shyǵys» baǵdarlamasy boıynsha da úıler salynýda.
Burynǵy aýdan ortalyǵy - Tavrııa aýylynda bıyl damý baǵdarlamasyna sáıkes ortalyq jáne qosalqy joldardyń barlyǵyna asfalt tóseldi.
16 jeltoqsanda jańa sporttyq-saýyqtyrý ortalyǵy kelýshilerge óz esigin ashady.
Sondaı-aq sýmen jabdyqtaý jelileri de rekonstrýktsııalaýdan ótýde. Qonys toıyn 14 kópbalaly otbasy toılaıdy.
«Aýyl úshin eń mańyzdysy - jylýmen qamtamasyz etý máselesi de sheshilýde. Ol úshin aýdandyq aýrýhana qazandyǵynyń qýattylyǵy arttyrylady. Onyń qaıta jańartylýy mektepti, balabaqshany, aýyldyq mádenıet úıin jylýmen qamtamasyz etýge múmkindik beredi. Bul úshin qosymsha jeliler tartylmaq. Sonymen qatar Tavrııadaǵy kásipkerlerge qoldaý kórsetiledi. Sebebi olar qala qurýshy kásiporyndardyń rólin atqaryp otyr. Kásip ıeleri aýylda jumys oryndaryn ashyp, halyqqa áleýmettik qoldaý kórsetýde», - dedi aımaq basshysy Danıal Ahmetov.
Jańa qondyrǵylarmen jabdyqtaldy
Kókpekti aýdany Samar aýylynda burynǵy aýdan ortalyqtaryn damytý baǵdarlamasy boıynsha sý qubyry jelilerin qaıta jańartý, kóshelerdi ortasha jóndeý jumystary júrgizilýde.
Aýyldyń perzenthana bólimshesi jańa qondyrǵylarmen jabdyqtaldy. Endi júkti áıelderge bosaný úshin júzdegen shaqyrym jol júrýdiń qajettiligi joq.
Ondaǵy dárigerler álemdegi ozyq klınıkalarda biliktilikterin arttyrdy. Osylaısha, Samardyń kishkentaı turǵyndarynyń kindigi óz aýyldarynda kesilýde.
Baǵdarlamanyń mańyzdy baǵyttarynyń biri – jas mamandardy qoldaý. Ol úshin Samarda jergilikti kolledjdiń jataqhanasy jóndelmek.
Al jas mamandarǵa turǵyn úı satyp alý úshin jeńildetilgen nesıe alý múmkindigi beriledi.
«Bozanbaı aýylynda baǵdarlama aıasynda aýrýhana bazasynda ońaltý ortalyǵy ashylady. Tabıǵaty kórikti aýyl Óskemennen nebári 45 shaqyrym jerde ornalasqan. Qazirdiń ózinde ortalyqty qajetti qural-jabdyqtarmen jabdyqtaý jobasy daıyndalýda. Dene shynyqtyrý-saýyqtyrý ortalyǵynyń qurylysy da bastaldy. Jańa ınfraqurylymdyq jobalar Bozanbaıǵa jas mamandardy tartýǵa sep bolady», - dedi oblys ákimi.
Qaınar aýylynda aýrýhanany kúrdeli jóndeý jáne tolyqtaı qaıta jabdyqtaý jumystary júrgizilýde. Aýyl - eń irgede jatqandardyń biri.
Sondyqtan mundaǵy halyqtyń jaǵdaıyn jaqsartý asa mańyzǵa ıe. Sondaı-aq «Semeı-Qaınar» respýblıkalyq jolyn jóndeýdiń de mańyzy erekshe.
Sport modýli salynbaq
Tarbaǵataı aýdany Aqjar aýylynda sport modýliniń qurylysy bastaldy. Ad aýyldyq aýrýhana zamanaýı medıtsınalyq qondyrǵylarmen jabdyqtalady. «Birqabatty Shyǵys» baǵdarlamasy boıynsha 30 turǵyn úıdiń qurylysyna qarjy bólindi. Sondaı-aq sport jáne balalar alańdary ornatylady.
Burynǵy aýdan ortalyqtaryn damytý baǵdarlamasynda aýyldyq týrızmdi damytýǵa erekshe nazar aýdarylǵan.
Aýyldarda týrıstik ınfraqurylym quratyn shaǵyn kásipkerlik sýbektilerine granttar bólý júıesiniń jobasy ázirlendi.
Іsin jańadan bastaǵan kásipkerlerge aqparattyq-ádistemelik qoldaý kórsetiledi. Osy rette, katonqaraǵaılyq kásipkerlerdiń alǵashqy jobasy sátti bastaldy.
***
Qoryta aıtsaq, Shyǵys Qazaqstandaǵy 13 aýyldyń turǵyndary úshin burynǵy aýdan ortalyqtaryn qoldaý baǵdarlamasy osylaı júrgizilip otyr.
Osy jyly bastalǵan baǵdarlama 2024 jylǵa deıin júzege asady.
