ShQO-da Buqtyrma qoımasynan sý aǵyzyla bastady
ÓSKEMEN. QazAqparat - Buqtyrma sý qoımasynyń tez tola bastaýyna baılanysty, shekti deńgeıge jetkizýge múmkindik bermeıtin josparly sý aǵyzý iske asyrylýda. Buqtyrma, Óskemen jáne Shúlbi gıdroelektrostansalarynda qosarlanǵan sý jiberý qamtamasyz etiledi.
Buqtyrma sý qoımasynda sý deńgeıin josparly túrde tómendetý oblys ákimi Danıal Ahmetov tapsyrmasy boıynsha ázirlengen keshendi jospar aıasynda 21 maýsymnan 3 shilde aralyǵynda júzege asyrylady.
Osy josparǵa sáıkes sý aǵyzý ár kún saıynǵy aralyqta 200 m3/s-ge arttyryla otyryp júrgiziledi. Osy kezeńinde Buqtyrma gıdroelektrostansasynda sý jiberý 1 500-den 2 400 m3/s-ge jetedi. Bir mezette Shúlbi GES-inde 3 000 m3/s-ge jetkiziledi.
«Osyndaı jaǵdaı sońǵy 50 jylda bolmaǵan edi. Alǵash ret Buqtyrma sý qoımasy jobalyq qýatyn toltyrdy», - dep atap ótti ShQO ákimi.
Budan keıin óńir basshysy keshendi sý jiberý josparyna naqty toqtala ketti. «Sý keptelýin boldyrmaý úshin Shúlbi GES-i shamamen 3000 m3/s sý aǵyzady. Óz kezeginde Óskemen jáne Buqtyrma GES-i jobalyq jáne tehnologııalyq sheshimdermen sý aǵyzady. Sý jiberý erkin rejimge keltirmeıdi. Eshbir eldi mekende sý deńgeıi artpaıdy. Barlyǵy baqylaýda. Barlyq oblystyq qyzmetter, aýdan ákimderi eskertilgen jáne qajetti sharalardy qolǵa alýǵa ázir otyr», - dedi Danıal Ahmetov arnaıy jıyn barysynda.
Sý resýrstaryn paıdalaný jáne qorǵaý jónindegi Ertis basseıindik ınspektsııasynyń málimdeýinshe Óskemennen tómen ornalasqan eldi mekenderdi sý basý qaýpi tónip turǵan joq.
