ShQO-da Buqtyrma ózeniniń sý deńgeıi kóterilip ketti

ÓSKEMEN. KAZINFORM – Shyǵys Qazaqstan oblysy Altaı aýdanynda Buqtyrma ózeniniń sý deńgeıi kóterilip ketti.  

ShQO ákimi baspasóz qyzmetiniń málimetine súıensek, 7 sáýir kúni oblystyq jedel shtabtyń kezekshi bólimine Altaı aýdany Bogatyrev aýylynyń turǵyny habarlasyp, aýlasyna sý kirgenin jetkizdi. Oqıǵa ornyna jedel túrde aýdan ákimi, TJD jáne kommýnaldyq qyzmet mamandary bardy.

«Anyqtalǵandaı, Buqtyrma ózeniniń deńgeıi kóterilip, aýyldyń eki turǵynynyń úıleriniń aýlasyna sý kirgen. Qazirde ShQO TJD, jergilikti atqarýshy organ qyzmetkerleri jáne áskerıler sýdy motopompamen sorý jumystaryn júrgizip jatyr. Jalpy sany 10 tehnıka jumyldyrylǵan. Sý deńgeıi túsip jatyr», - delingen aqparatta.

Aýlasyna sý kirgen eki úıde 4 adam turady. Olar evakýatsııadan óz erikterimen bas tartyp, týysqandarynyń úılerine ýaqytsha turaqtady.

Aýdan ákimi zardap shekken azamatarmen kezdesip, barlyǵy qysqa ýaqytta memleket tarapynan qalpyna keltiriletinin jetkizdi.