ShQO-da birneshe jyl buryn ǵana salynǵan sý qubyrlary jóndeýdi qajet etip otyr
ÓSKEMEN. KAZINFORM – Shyǵys Qazaqstan oblysynda sapasyz salynǵan sý qubyrlary jóndele bastady.
Óńirdegi birneshe eldi mekendegi ınjenerlik jeliler apatty jaǵdaıda dep tanylyp, turǵyndar taza aýyzsýǵa qol jetkize almaı otyr. Tipti birneshe qylmystyq is qozǵalyp, jaýapty sheneýnikter men merdigerler sottaldy.
Eń kóp zańbuzýshylyqtar Samar aýdanyna qarasty Aqqala, Qulynjon jáne Kókjyra aýyldarynda tirkeldi.
Bul eldi mekenderde sý qubyry 2020-2021 jyldary salynǵan. Ol kezde tapsyrys berýshi Kókpekti aýdanynyń ákimdigi bolǵan. Keıin ákimshilik-aýmaqtyq bólinister nátıjesinde bul aýmaq Abaı oblysyna ótti de, jaýapkershilik Samar aýdanynyń ákimdigine júkteldi. Sapasyz qurylysqa qatysty isti bolǵandar arasynda aýyl ákiminiń orynbasary da bar.
- Biz ınjenerlik tekserý júrgizip, júıeni tolyq iske qosý úshin qandaı jumystar qajet ekenin anyqtadyq. Oblystyq bıýdjetten 309,4 mln teńge bólindi. Qazir konkýrstyq rásimderdi aıaqtap jatyrmyz. Merdiger anyqtalysymen qalpyna keltirý jumystaryn bastaımyz, - dedi ShQO Energetıka jáne TÚKSh basqarmasynyń basshysy Nurlan Ramazanov.
Osyǵan uqsas jaǵdaı Glýbokoe aýdanyna qarasty Beloýsovka kentinde de tirkelgen. Munda byltyr 160-tan astam ret qubyr jaryldy. Sý qubyry 2019 jyly salynǵanymen, sapasyz dep tanylyp otyr. Bul jerde de kinálilerge qatysty qylmystyq is qozǵalǵan.
- Búginde qalpyna keltirý algorıtmin jasap, 4 problemalyq ýchaskeni anyqtadyq. Bıyl sonyń ekeýin jóndeımiz. Atap aıtqanda, sý sorǵy stantsııasynan taza sý rezervýaryna deıingi magıstralin jáne Grebenıýshka shaǵyn aýdanyndaǵy jeliler. Qazir bul jerdegi halyqqa sý tasyp jetkizip otyrýǵa májbúrmiz. 70 mln teńge bólindi, taǵy 318 mln teńgeni kútip otyrmyz. Negizgi jumystardy qarashaǵa deıin aıaqtaý josparlanǵan, - dedi basqarma basshysy.
Sonymen qatar 1 qyrkúıekke deıin Marqakól aýdanyna qarasty Boran aýylyndaǵy sý qubyrynyń aqaýlary joıylmaq. Jalpy, ShQO Energetıka jáne TÚKSh basqarmasynyń málimetinshe, jyl sońyna deıin óńirde 762,9 shaqyrym sý qubyry jelisi jańadan salynyp, jańǵyrtylady.
Eske salsaq, osyǵan deıin elimizde sýdy tasyp iship otyrǵan qansha aýyl bar ekendigi jaıly jazǵanbyz.