ShQO-da brakonerlikke tosqaýyl qoıý úshin arnaıy mobıldi toptar quryldy
ÓSKEMEN. QazAqparat – Shyǵys Qazaqstan oblysynda 15 sáýirden bastap keń aýqymdy «Saıǵaq» tabıǵat qorǵaý aktsııasy bastaldy, dep habarlaıdy QazAqparat tilshisi.
Brakonerlikpen kúresý jáne zańsyz ań aýlaýǵa, ósimdikter men janýarlar túrlerin ótkizý, tasymaldaýǵa qarsy is-qımyl jumystaryn kúsheıtý maqsatynda QR Ekologııa, geologııa jáne tabıǵı resýrstar, QR Іshki ister mınıstrlikteri jáne QR Ulttyq qaýipsizdik komıteti 15 sáýir men 15 mamyr jáne 1 jeltoqsan men 31 jeltoqsan aralyǵynda keń aýqymdy «Saıǵaq» tabıǵat qorǵaý aktsııasyn ótkizý týraly buıryqqa qol qoıdy. Buıryq sheńberinde aktsııany ótkizý kezinde tabıǵat qorǵaý, polıtsııa, jáne ózge de organdardyń birlesken is-qımyl jospary bekitilgen.
«Bıyl Shyǵys Qazaqstan aýmaǵynda atalǵan aktsııa ekinshi jyl ótkizilmek. Bul dala bókenderiniń sany artyp, Qaraǵandy jáne Pavlodar oblystarynyń shekaralas aýdandarynan óńir aýmaǵyna kirip qana qoımaı, sońǵy jyldary onyń Aıagóz aýdanynda jáne Semeı qalasynda mekendegeni baıqalady. Búgingi kúni ShQO orman sharýashylyǵy jáne janýarlar dúnıesi aýmaqtyq ınspektsııasy, ShQO Polıtsııa departamenti, «Ohotzooprom» RMKK qyzmetkerlerimen tabıǵat qorǵaý zańnamalaryn buzýshylyq faktilerin anyqtaý jáne jolyn kesý boıynsha reıdtik is-sharalardy júzege asyrý úshin mobıldi toptar qurylǵan», - dep habarlady oblystyq Aqparat ortalyǵy.
Aktsııaǵa atalǵan uıymdardyń ınspektorlyq quramy, ótimdiligi joǵary avtokólikter men qajetti quraldar tartylady.
Aıta keteıik, Qazaqstan Respýblıkasynyń búkil aýmaǵynda kıikterdi atýǵa 2023 jylǵa deıin tyıym salynǵan. Kıik atqandar múlki tárkilene otyryp, 3 jyldan 12 jylǵa deıin bas bostandyǵynan aıyrylady.
