ShQO-da brakonerlerdiń áreketin áshkereleý úshin drondar qoldanysqa engizildi
ASTANA. QazAqparat - Shyǵys Qazaqstanda tájirıbege birinshi ret engizilgen kvadrokopterler arqyly zańsyz balyq aýlap júrgen brakonerlerdiń áreketi áshkerelendi, dep habarlaıdy «QazAqparat» HAA tilshisi ShQO tabıǵı resýrstar jáne tabıǵat paıdalanýdy retteý basqarmasynyń baspasóz qyzmetine silteme jasap.
Vedomstvonyń baspasóz qyzmetiniń keltirgen málimetine sáıkes, bıoresýrstarǵa qarsy jasalatyn zańsyzdyqtardyń aldyn alý úshin basqarma zamannyń ozyq tehnologııalaryn qoldanysqa engizgen. Máselen, 1 qarashadan bastap tabıǵat qorǵaýshylar drondar arqyly patrýl júrgizetin bolǵan.
«Kvadrokopterler 1 qarashadan bastap qoldanysqa engizildi. Zamanaýı tehnıkanyń arqasynda Torańǵy shyǵanaǵy men Buqtyrma sý qoımasynda zańsyz balyq aýlaýǵa qatysty úsh jaǵdaı tirkeldi. Zań buzýshylardan eki qaıyq, qaıyq motorlary, jalpy uzyndyǵy 360 metrge jetetin sıntetıkalyq aý men 30 keli balyq tárkilendi. Keltirilgen shyǵyn 75 myń teńgeni qurap, olarǵa aıyppul salyndy», - dep habarlaıdy vedomstvonyń baspasóz qyzmetinen.
Buryn qamystyń arasynda jasyrylǵan qaıyqtardy tabý memlekettik ınspektorlarǵa qıynǵa soǵatyn edi. Al ozyq kameraly drondar bul zańsyz áreketterdi áshkereleýge taptyrmas quralǵa aınalǵan.
Illıýstratsııalyq foto
