ShQO-da brakonerlerden bir jarym tonnaǵa jýyq balyq tárkilendi

ÓSKEMEN. QazAqparat – Shyǵys Qazaqstan oblysynda polıtsııa qyzmetkerleri zańsyz aýlanǵan bir jarym tonnaǵa jýyq balyqty tárkiledi, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, óńir boıynsha 16 sáýirden bastap «Ýyldyryq-2021» jedel aldyn alý sharasy júrgizilýde. Shara barysynda sý qoımalarynda baqylaý kúsheıtilgen.

Tártip saqshylary Zaısan kóliniń jaǵasyndaǵy Qarsaqbaı aýyly mańynda zańsyz balyq aýlaǵan er adamdy ustady. Onyń rezeńke qaıyǵynan tıisti qujattary joq 5 qap túrli balyq tabylǵan.

«Aqmektep aýylynyń 33 jastaǵy turǵynynan 51 keli kókserke, 4 keli shortan, 64 keli taban jáne 17 keli alabuǵa balyqtary tárkilendi. Osynyń saldarynan keltirilgen shyǵyn mólsheri 300 000 teńgeni qurady. Atalǵan fakti boıynsha QR QK-niń 335-baby 3-bóliginiń 2-tarmaǵyna sáıkes sotqa deıingi tergeý amaldary júrgizilýde», - dedi ShQO PD bastyǵy Saǵat Mádıev.

Aıta keteıik, «Ýyldyryq-2021» jedel aldyn alý sharasy bastalǵaly beri 239 reıd ótkizilip, sonyń nátıjesinde 235 quqyqbuzýshylyq anyqtaldy. 1400 keliden astam balyq tárkilengen. Memleketke keltirilgen zalaldyń jalpy somasy 1 700 000 teńgeni qurap otyr.