ShQO-da bir kúnde 70-ten astam kólik qar qursaýynda qalǵan

ÓSKEMEN. KAZINFORM – Shyǵys Qazaqstan oblysynyń qutqarýshylary bir kúnde 72 kólikti qar qursaýynan shyǵardy. 

Kesheli beri Shyǵys Qazaqstanda qalyń qar jaýyp, burqasyn bolyp tur. Keıingi táýlikte óńir qutqarýshylary qar qursaýynda qalǵan 72 avtokólikti shyǵaryp, 20 adamdy, onyń ishinde 4 balany evakýatsııalady.

- Kólikter negizinen «Óskemen-Rıdder» tasjolynda, «Óskemen-Shemonaıha-RF shekarasy» respýblıkalyq mańyzy bar tasjolynda, Samara aýdanyndaǵy «Óskemen-Tarǵyn-Samar» tasjolynda, Glýbokoe kentindegi «Shemonaıha-Sekısovka» tasjolynda qarǵa batqan. ShQO Tótenshe jaǵdaılar departamentinde táýlik boıy jumys isteıtin jedel shtab quryldy. Jol qyzmetkerleri jáne jergilikti atqarýshy organdarmen birlesip, halyqqa kómek kórsetilip jatyr, - dep habarlady oblystyq TJD baspasóz qyzmetinen. 

Qutqarýshylar jol ýchaskelerin ótimdiligi joǵary tehnıkamen patrýldep júr. Turyp qalǵan kólikterdi tekserip, jedel túrde qajetti kómek kórsetýde.

Eske salsaq, osyǵan deıin Rıdderde qar kóshkininen keıin halyq sýsyz qalǵany habarlanǵan.