ShQO-da bir aı boıy izdeýde júrgen alaıaq Aqmola oblysynda ustaldy

ÓSKEMEN. KAZINFORM — Shyǵys Qazaqstan oblysynda izdeýde júrgen alaıaqty polıtseıler Aqmola oblysynda ustady.

ShQO polıtsııa departamenti baspasóz qyzmetiniń málimetine súıensek, jábirlenýshi kólik satamyn dep sendirgen 27 jastaǵy er adamǵa 350 000 teńge bergen. 

— Alaıda aldanyp qalǵanyn túsingen polıtsııaǵa júgindi. Bir aıdan astam ýaqyt izdeýde bolǵan kúdikti Aqmola oblysyndaǵy demalys bazalarynyń birinde ustaldy. Belgili bolǵandaı, ol sol jerde jasyrynyp kelgen, — delingen aqparatta.

Qazirgi ýaqytta er adam ýaqytsha ustaý ızolıatoryna qamaýǵa alyndy.

Aıta keteıik, 2024 jyly Shyǵys Qazaqstan oblysynyń polıtseıleri 45 qylmyskerdi ustady. Olardyń 19-y buryn jasalǵan qylmystar úshin izdeýde bolǵan.

Eske salsaq, osyǵan deıin Abaı oblysynda esirtki taratýshylardan quny 20 mln teńgeden asatyn mefedron tárkilengeni habarlanǵan.