ShQO-da bir aptada kólikti mas kúıde aıdaǵan 16 adam ustaldy
ÓSKEMEN. KAZINFORM – Shyǵys Qazaqstan oblysynda polıtsııa qyzmetkerleri bir aptada kólikti mas kúıde aıdaǵan 16 adamdy anyqtady.
ShQO polıtsııa departamentiniń málimetine súıensek, sońǵy jeti kúnde óńir boıynsha jol qozǵalysy erejelerin buzýdyń 3 myńnan astam deregi tirkelgen.
– Polıtseıler jol-kólik oqıǵalarynyń aldyn alýǵa jáne jol qozǵalysyna qatysýshylardyń qaýipsizdigin qamtamasyz etýge baǵyttalǵan profılaktıkalyq sharalardy jalǵastyryp jatyr. Sonyń nátıjesinde, azamattardyń ómiri men densaýlyǵyna qaýip tóndirýi múmkin ereje buzýshylyqtar anyqtaldy. Onyń ishinde qaýipsizdik beldikterin taqpaý, rólde otyryp uıaly telefondy paıdalaný, jaıaý júrginshilerge jol bermeý, qarsy baǵytqa shyǵyp ketý jáne mas kúıde kólik aıdaý faktileri boldy, – delingen aqparatta.
Máselen, bir apta ishinde qaýipsizdik beldigin taqpaýdyń – 744, kólikti basqarý kezinde uıaly telefondy paıdalanýdyń – 389, jaıaý júrginshilerge jol bermeýdiń 180 deregi anyqtaldy. Sondaı-aq qarsy baǵytqa shyǵýdyń – 18 jáne mas kúıde kólik tizgindeýdiń 16 deregi tirkeldi. Ereje buzýshylar tıisti jaýapkershilikke tartyldy.
Eske salsaq, osyǵan deıin ShQO-da bıyl abattandyrý qaǵıdalary 5 myńnan astam ret buzylǵany habarlanǵan.
