ShQO-da bozbala attan qulap, ózenge aǵyp ketken
NUR-SULTAN. QazAqparat - Shyǵys Qazaqstannyń Aıagóz aýdanynda 16 jastaǵy bozbalanyń denesi tabyldy, dep habarlaıdy.
Marqumnyń denesin tótenshe jaǵdaı ókilderi men saqshylar kúni boıy izdegen. Máıit qarańǵy qoıýlanǵan kezde baryp tabylǵan.
Oblystyq tótenshe jaǵdaılar qyzmeti taratqan aqparatqa súıensek, Aıagóz ózeninen mal aıdap ótken bozbalany at aýdaryp ketken. Tasyp jatqan ózen onyń denesin aǵyzyp áketken.
«Habar jetken boıda bizdiń qyzmetkerler oqıǵa ornyna bardy. Іzdeý jumystaryna 50-den astam adam tartyldy. Arasynda qarapaıym turǵyndar da bar. Bul kezde Aıagóz ózeniniń tereńdigi 3 metrge deıin jetedi. Marqumnyń denesi oqıǵa ornynan 50 metr jerden shyqty» - deıdi Aıagóz aýdandyq tótenshe jaǵdaılar bóliminiń aǵa ınjeneri Mádı Qajybaev.
Qutqarýshylar ózender tasyp jatqandyqtan, malshylarǵa ótkelden mal aıdaý kezinde saq bol kerektigin eskertedi.
