ShQO-da boıjetken taýdan syrǵanaımyn dep mert boldy
ASTANA. QazAqparat - ShQO-daǵy taý-shańǵysy kesheninde úrlengen dóńgelek syrǵanaq teýip júrgen boıjetken qaza tapty, dep habarlaıdy «QazAqparat» tilshisi.
«Búgin 27 aqpan kúni taý shańǵysy jolymen syrǵanaq tebemin dep qyz bala mert boldy. Arqan jolmen úrlengen shanany taý basyna alyp shyǵýǵa tolyqtaı tyıym salynǵan. Qyzmetkerlerdiń eskertýine qaramastan jasóspirimder shańǵy jolynyń bıigine shyǵyp tómen qaraı syrǵanaǵan. (tıýbıng úshin tómendegi alańqaıda arnaıy jasaqtalǵan oryn bar). Oqıǵa ornyna jedel jetken medıtsına qyzmetkerleri qatty jaralanǵan qyzdy aman alyp qala almady»,- delingen taý-shańǵysy kesheniniń Instagramdaǵy paraqshasynda.
Qazir oqıǵa ornynda tergeý jumystary júrip jatyr. «Ýstınka Live» gazetiniń málimetine súıensek, qaza tapqan mektep oqýshysynyń jasy 17-de.
