ShQO-da bos jatqan 64 myń gektardan astam jer memleketke qaıtaryldy

ÓSKEMEN. KAZINFORM — Shyǵys Qazaqstan oblysynda paıdalanylmaı jatqan aýyl sharýashylyǵy maqsatyndaǵy jerler memleket menshigine qaıtarylyp jatyr.

ShQO Jer qatynastary basqarmasynyń málimetine súıensek, 7 aıdyń ishinde memleketke 64,2 myń gektar jer qaıtarylǵan. Bul jerlerdiń kóbinde jaldaý merzimi aıaqtalǵan jáne ıeleri jerden óz erkimen bas tartqan. 

— 2022-2024 jyldar aralyǵynda jalpy kólemi 343 myń gektar jer memleketke qaıtaryldy. Onyń 70 myń gektary qaıtadan aýyl sharýashylyǵy aınalymyna engizilgen. Jerlerdiń bir bóligi halyqqa, al bir bóligi agroqurylymdarǵa konkýrs arqyly berildi. Osy jyldyń birinshi jartysynda óńir boıynsha kásipkerlik maqsatta jer satý boıynsha 39 aýktsıon ótkizildi, — delingen aqparatta.

Sonyń nátıjesinde, jalpy aýdany 31 gektardy quraıtyn 53 jer ýchaskesi satylyp, bıýdjetke 45,5 mln teńge tústi. Sonymen qatar aýyl sharýashylyǵy maqsatyndaǵy 13,9 myń gektar jer 16 konkýrs arqyly 101 jer paıdalanýshyǵa berildi.

— Oblystyq jer komıssııasy 4 otyrys ótkizip, 16 materıal qaraldy. Sonyń ishinde 15-i boıynsha jer paıdalaný quqyǵyn berý maquldanyp, 1 ótinish jerdiń bos bolmaýyna baılanysty qanaǵattandyrylmady. Jyl sońyna deıin bul baǵyttaǵy jumystar jalǵasyn tabady, — delingen habarlamada.

Eske salsaq, osyǵan deıin Atyraý oblysynda 31 myń gektar ıgerilmegen jer memleket menshigine qaıtarylǵany habarlanǵan.