ShQO-da borannan úılerine qaıta almaı qalǵan sportshy balalarǵa qutqarýshylar kómektesti
ÓSKEMEN. QazAqparat – Shyǵys Qazaqstan oblysynda aýylǵa jarysqa baryp, aqtútek borannan Óskemenge qaıta almaı qalǵan 8 sportshy bala men eki bapkerge qutqarýshylar kómekke keldi, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, qutqarýshylarǵa Glýbokoe aýdany Topchıha aýylyndaǵy balalarǵa arnalǵan sport klýbtarynyń birinde 2 jattyqtyrýshy men 8 balanyń Óskemenge qaıta almaı qalǵany týraly habar túsken.
«Olar aýa raıynyń qolaısyzdyǵynan aýyldan shyǵyp, qalaǵa jete almaǵan. Sportshylardyń ózderimen ala shyqqan azyq-túlikteri de taýsylǵan. Kómekke TJD jedel-qutqarý jasaǵynyń qyzmetkerleri jol talǵamaıtyn «ShERP» tehnıkasymen keldi», - delingen aqparatta.
Qutqarýshylar jattyqtyrýshylar men balalardy qalaǵa aman-esen jetkizdi. Olarǵa medıtsınalyq kómek qajet bolǵan joq.
Osy rette, oblystyq TJD qyzmetkerleri azamattardan tasjoldardyń jabylýyna túsinistikpen qaraýdy, jolǵa shyqpaýdy suraıdy.
