ShQO-da borannan naýqasqa jete almaı qalǵan dárigerlerge qutqarýshylar kómekke keldi

ÓSKEMEN. QazAqparat – Shyǵys Qazaqstan oblysynda borannan naýqasqa jete almaı qalǵan dárigerlerge qutqarýshylar kómekke keldi, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, oqıǵa Zaısan aýdanynda bolǵan.

«Aınabulaq aýyldyq okrýgindegi Aqtam qystaǵynda naýqasqa dáriger kómegi qajet boldy. Alaıda qalyń qar men borannan jedel járdem qyzmetkerleri onda jete almaǵan. Olarǵa kómekke qutqarýshylar kelip jetti», - delingen aqparatta.

TJD qyzmetkerleri dárigerlerdi jetýi qıyn jerge jol talǵamaıtyn kólikpen jetkizdi. Birneshe shaqyrym jolsyz jerdi eńserýge týra kelgen.

Qystaqqa kelgen soń dárigerler naýqasqa shuǵyl medıtsınalyq kómek kórsetti.

Foto: ShQO TJD baspasóz qyzmeti