ShQO-da boranǵa baılanysty birqatar jolda kólik qozǵalysy shekteldi
ÓSKEMEN. QazAqparat – Shyǵys Qazaqstan oblysynda boranǵa baılanysty birqatar jolda kólik qozǵalysy shekteldi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, aýa raıy qolaısyzdyǵyna, naqty aıtqanda boran soǵyp, joldyń durys kórinbeýine baılanysty óńirde birqatar jolda kólik qozǵalysy shekteldi.
«Omby-Maıqapshaǵaı» tasjolynyń 756-906 shaqyrymynda (Semeı qalasy men Qalbataý aýylynyń aralyǵy) jáne «Óskemen-Shemonaıha-RF shekarasy» tasjolynyń 35-123 shaqyrymynda tirkemesi bar júk kólikteri men avtobýstardyń qatynaýyna tyıym salyndy», - dep habarlady vedomstvo ókilderi.
Osy rette, departament mamandary turǵyndarǵa alys saparǵa shyǵar aldynda joldardyń jaı-kúıin «Dármen» mobıldi qosymshasy arqyly tekserip otyrýǵa keńes beredi.
