ShQO-da boranǵa baılanysty taǵy bir jol jabyldy
ÓSKEMEN. KAZINFORM — Shyǵys Qazaqstan oblysyndaǵy joldardyń biri kóliktiń barlyq túri úshin jabyldy.
ShQO Tótenshe jaǵdaılar departamenti baspasóz qyzmetiniń málimetine súıensek, aýa raıy qolaısyzdyǵyna, naqty aıtqanda boran men aıazǵa baılanysty respýblıkalyq mańyzy bar jol jabyldy.
— «Qytaı shekarasy-Maıqapshaǵaı-Zaısan aınalma joly-Qalbataý-Semeı-Pavlodar-Reseı shekarasy» jolynyń 1177-1256 shaqyrymy aralyǵynda (Aqjar aýylynyń burylysynan Zaısan qalasyna deıingi jol) kóliktiń barlyq túriniń qozǵalysyna tyıym salyndy. Sondyqtan kólik júrgizýshilerin baǵyttaryn aldyn ala josparlap alýdy suraımyz, — dep habarlady vedomstvo ókilderi.
Qutqarýshylar halyqqa alys saparǵa shyǵar aldynda joldardyń jaı-kúıin «Dármen» mobıldik qosymshasy arqyly tekserip otyrýǵa keńes berdi.
Eske salsaq, osyǵan deıin 17 qańtar tańerteń eldegi qaı joldar jabyq ekendigi jaıly jazǵanbyz.