ShQO-da boranda jolda qalǵan balyqshylarǵa kómek kórsetildi
ÓSKEMEN. QazAqparat – Shyǵys Qazaqstan oblysynyń qutqarýshylary boranda jolda qalǵan balyqshylarǵa kómekke keldi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, kesheli beri óńirde aýa raıy nasharlap, kóktaıǵaq bolyp, qatty boran soǵýda. Soǵan baılanysty birqatar tasjolda kólik qozǵalysy shektelgen bolatyn.
«Halyqqa alys saparǵa shyqpaý qajettigi jaıly eskertýlerimizge qaramastan eki balyqshy avtokólikpen Alebastr sý qoımasyna shyqqan. Biraq jol-jónekeı kólikteri buzylyp qaldy. Oqıǵa ornyna jedel №34 órt sóndirý bóliminiń qyzmetkerleri kelip jetken. Olar 2 adamdy evakýatsııalap, jaqyn mańda ornalasqan aýyldaǵy týǵan-týystarynyń úıine jetkizdi», - delingen habarlamada.
Osy rette, TJD turǵyndarǵa alys saparǵa shyǵar aldynda joldardyń jaı-kúıin «Dármen» mobıldi qosymshasy arqyly tekserip otyrýǵa keńes beredi.
