ShQO-da boranda joǵalyp ketken malshy 2 kúnnen keıin tabyldy
SEMEI. QazAqparat – Shyǵys Qazaqstan oblysy Abaı aýdany Sarjal aýylynda iz-tússiz joǵalyp ketken malshy 2 kúnnen soń tabyldy, dep habarlaıdy QazAqparat.
28 qańtar kúni saǵat 08.00 shamasynda Semeı qalalyq órt sóndirý jáne avarııalyq-qutqarý qyzmetiniń «112» nómirine Sarjal aýylynda qystaýǵa ketken malshynyń joǵalyp ketkeni jaıly habar túsken. Qutqarýshylar jol talǵamaıtyn kólikpen dereý sol jerge attanyp, izdestirý sharalaryn júrgizedi. Alaıda qalyń qar men burqasynnyń saldarynan sol kúni ony tabý múmkin bolmaǵan.
«Kelesi kúni saǵat 07.20-da sharýa qojalyǵynyń ıesi joǵalǵan er adammen telefon arqyly baılanysqa shyǵa aldy. Ol óziniń adasyp ketkenin, dál qazir qaıda kele jatqanyn bilmeıtinin jetkizgen. Sodan keıin baılanys úzilip ketip, qaıta qosylmady», – dep habarlady ShQO TJD baspasóz qyzmeti.
Іzdestirý jumystary 29 qańtarda tún jamylǵanǵa deıin júrgizilse de malshy tabylmapty. Qutqarýshylar jeti qystaq pen «Qarajyra» kenishine deıingi aýmaqty túgel sharlaǵan. Kún shyqqanda qaıtadan kómir razrezindegi jazyq dalaǵa izdeýge shyǵady.
«30 qańtarda tús kezinde joǵalǵan malshynyń «Karajyradan» 10 shaqyrymdaı qashyqtyqtaǵy aýylǵa jetkeni týraly aqparat keldi. Oǵan medıtsınalyq pýnktide alǵashqy kómek kórsetilgen. Aldyn ala dıagnoz boıynsha malshynyń eki aıaǵynyń saýsaqtary men murny úsip ketken. Qazir Semeıge jetkizilgen ol jedel járdem aýrýhanasyna jatqyzyldy» delingen vedomstvo málimetinde.
