ShQO-da boranda qalǵan eki shopan qutqaryldy

ÓSKEMEN. QazAqparat – Shyǵys Qazaqstan oblysy Ulan aýdanynda boranda qalǵan eki shopan qutqaryldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, eki shopan boranǵa qaramastan Troınıtskoe aýylynyń mańyndaǵy qystaqqa atpen barǵan. Qaıtyp oralmaq bolǵan olar ózdiginen jete almaı, qutqarýshylardy shaqyrdy.

«Jedel-qutqarý jasaǵynyń qyzmetkerleri sol jerge jol talǵamaıtyn «Trekol» tehnıkasymen kelip jetti. Qutqarýshylar olardy jaqyn mańdaǵy aýylǵa deıin evakýatsııalady. Shopandarǵa medıtsınalyq kómek qajet bolmady», - delingen aqparatta.

Aıta keteıik, qutqarýshylar buǵan deıin aýa raıynyń nasharlaıtyndyǵy men burqasyn bolatyndyǵy týraly eskertken bolatyn.