ShQO-da boranda qalǵan 12 reseılik evakýatsııalandy

ÓSKEMEN. QazAqparat – Shyǵys Qazaqstan oblysynda boranda qalǵan 12 reseılik evakýatsııalandy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, respýblıkalyq mańyzy bar «Óskemen-Shemonaıha-RF shekarasy» tasjolynyń Shemonaıha aýdanyndaǵy ýchaskesinde aqtútek boran saldarynan 12 adam jolda qalǵan.

«Habar túse salysymen olarǵa kómekke jedel-qutqarý jasaǵynyń qyzmetkerleri jol talǵamaıtyn «TREKOL» avtokóligimen kelip jetti. 12 reseılik, onyń ishinde 2 bala qaýipsiz jerge kóshirildi», - delingen aqparatta.

Qazirgi ýaqytta sheteldikter Shemonaıha qalasyndaǵy qonaq úıge ornalastyryldy. Onda jergilikti atqarýshy organdar ystyq tamaqpen qamtamasyz etti.

Osy sátte óńirde 15 tasjol jabyq kúıinde qalyp otyr. Qutqarýshylar azamattardan aýa-raıy turaqtanǵansha alys saparǵa shyqpaý qajettigin eskertedi.

Foto: ShQO TJD