ShQO-da boranda adasqan eki adamnyń biri kóz jumdy

ÓSKEMEN. KAZINFORM – Shyǵys Qazaqstan oblysy Kúrshim aýdanynda boranda adasqan eki adam tabyldy. Onyń biri kóz jumdy, al ekinshisiniń aıaǵy úsip ketken.

Oqıǵa jergilikti sıpattaǵy tótenshe jaǵdaı rejımi jarııalanǵan Kúrshim aýdanynda bolǵan. Maraldy aýyldyq okrýginde eki adam boranda qalǵan.

«Úshbulaq aýylynan atpen qaıtyp kele jatqan er adamdar qarly boranda adasyp qaldy. Onyń biri kóz jumyp, ekinshisiniń aıaǵy úsip ketti. Qazirgi ýaqytta oǵan sanıtarlyq avıatsııamen dárigerler kómekke shyqty. Er adamdy Óskemendegi medıtsınalyq mekemege jetkizý josparlanyp otyr», - dep habarlady ShQO Densaýlyq saqtaý basqarmasynyń baspasóz qyzmeti.

Vedomstvo dereginshe, sanıtarlyq avıatsııa brıgadasynyń quramynda reanımatolog Aleksandr Patrın men feldsher Larısa Velıchko bar.