ShQO-da boran: «Almaty-Óskemen» tasjolynda kólik qozǵalysy shekteldi
ÓSKEMEN. QazAqparat – Shyǵys Qazaqstan oblysynda jeldiń kúsheıýine baılanysty tasjoldardyń birinde kólik qozǵalysy shekteldi, dep habarlaıdy QazAqparat tilshisi.
«Qazavtojol» JShS ShQOF málimetine súıensek, 16 qańtarda saǵat 17.30-da aýa raıynyń qolaısyzdyǵyna, naqty aıtqanda jeldiń kúsheıýine baılanysty respýblıkalyq mańyzy bar «Almaty-Óskemen» tasjolynyń 778-967 shaqyrymynda (Aıagóz qalasy men Jarma aýdany Qalbataý aýylynyń arasy) júk kólikteri men avtobýstardyń qozǵalysyna ýaqytsha shekteý qoıyldy.
Osy rette, ShQO Tótenshe jaǵdaılar departamentiniń mamandary óńir turǵyndaryna alys saparǵa shyqqan kezde Darmen mobıldi qosymshasy arqyly joldardyń jaı-kúıi týraly aldyn ala bilip alýǵa keńes beredi.
Esterińizge sala ketsek, osyǵan deıin Jarma aýdanynda qatty jel qazandyqtyń shatyryn ushyryp áketkenin habarlaǵan bolatynbyz.
