ShQO-da bilim salasynda 220 mln teńge zańsyz tólengen – antıkor
ÓSKEMEN. KAZINFORM – Shyǵys Qazaqstan oblysynda bilim salasynda 220 mln teńge zańsyz tólengen. Bul týraly baspasóz konferentsııasy barysynda QR Sybaılas jemqorlyqqa qarsy is-qımyl agenttigi ShQO boıynsha departamentiniń basshysy Denıs Shakenov málim etti.
Óńirdegi bilim salasynda sybaılas jemqorlyq faktileri az anyqtalyp jatqan joq. Sońǵy 3 jyldyń ózinde sybaılas jemqorlyqqa qatysty 68 qylmystyq is tirkelgen.
Barlyǵy 50-ge jýyq adam jaýapqa tartyldy. Keıbir qylmystyq ister áli kúnge deıin tergelip jatyr.
«Bilim salasynda 220 mln teńge zańsyz tólengeni anyqtaldy. Onyń ishinde óz adamyn bir jumysqa ornalastyryp qoıyp, zańsyz jalaqy tólep otyrý jáne eńbekaqy mólsherin negizsiz kóterip jiberý faktileri jıi tirkelgen. Sondyqtan barlyq mektepterde zańsyz taǵaıyndalǵan ústemeaqylardy anyqtaýǵa múmkindik beretin bultty býhgalterııa júıesi engizilip jatyr», - dedi Denıs Shakenov
Eske salsaq, osyǵan deıin Jambylda negizsiz tólengen 147,1 mln teńge bıýdjetke qaıtarylǵany habarlanǵan.
