ShQO-da bıznestiń jańa túri paıda boldy
«Bastaý-bıznes» boıynsha arnaıy kýrstan ótken kýrchatovtyq Zúlfııa Zımınova elden erekshe kásip túrin tańdaǵan. Ol kásip «keıterıng» dep atalady. Keıterıng qyzmeti oryn tańdamaıdy. Úı bolsyn, demelys aımaǵy men kásiporyn ǵımaraty bolsyn, kez kelgen jerde banket uıymdastyryp, fýrshet jasap beredi.
«Kýrchatov - shaǵyn shahar. Negizinen munda ǵalymdar ómir súredi. Olar túnge deıin jumys isteıdi, sondyqtan, as ázirleýge ýaqyttary bolmaıdy. Osy jaıtty baıqaǵan qyzym keıterıng qyzmetine bet burdy», - deıdi jas kásipker Zúlfııanyń anasy Sholpan.
Zúlfııa Zımınovanyń otbasy Kýrchatov qalasyna Shymkentten 10 jyl buryn kóship kelgen. Samsa men palaý, tandyr sııaqty shyǵys taǵamdaryn jaqsy pisiredi. Osy qabileti ony jańa salany qoryqpaı tańdaýyna negiz bolǵan.
«Bastaý» baǵdarlamasy arqyly jobamdy sátti qorǵap, 1 mln 230 myń teńge kóleminde jeńildetilgen nesıe aldym. Ol qarajatqa saltanatty dastarhanǵa arnalǵan ydys-aıaq, tandyr peshin, kondıterlik pesh pen mangal satyp aldyq. Aýdany 64 sharshy metr bolatyn ǵımaratty jaldap, ishine boıler ornattyq. Bárinen de kásibı aspaz tabý qıyn boldy. Jumyspen qamtý ortalyǵy arqyly eki áıeldi taptyq. Qazir olar kúndiz jumys istep, keshki ýaqytta aspaz sheberligin oqyp jatyr. Kúnine kem degende 350 dana nan-toqash ónimi satylady», - deıdi Zúlfııa Zımınova.
«Kúndelikti jumysty tańǵy tórtten bastaımyz. Turaqty klıentterimiz bar. Tańertennen shaı, toqashtar, ystyq nan, samsa, pırojkı daıyndap qoıamyz», - deıdi 24 jastaǵy boıjetken.
Kásipker qyz bolashaqta bul isin keńeıtip, «pıtstserııa» ispettes oryn ashqysy keledi. Oıyn-saýyq oryndaryna kende Kýrchatov qalasy úshin bul óte paıdaly nysan bolmaq.