ShQO-da bıznes-granttardyń ıegerleri belgili boldy
ÓSKEMEN. QazAqparat - Shyǵys Qazaqstanda 35 shaǵyn bıznes ókiline 3 mln teńgelik ınnovatsııalyq grant beriletin boldy, dep habarlaıdy QazAqparat tilshisi.
Atalmysh granttar óz isin damytqysy kelgen kásipkerlerge tehnologııa nemese franshıza, óndiriske qajet qondyrǵylar satyp alý úshin berilmek. JOO, memlekettik organdar, úkimettik emes uıym jáne BAQ ókilderinen jasaqtalǵan komıssııa músheleri 93 jobanyń ishindegi eń ózekti degen 35-in tańdap aldy.
«Bizdi úmitkerlerdiń arasynda Úrjar, Katonqaraǵaı, Tarbaǵataı, Kúrshim sııaqty shalǵaı aýdandardan kelgen kásipkerlerdiń kóp bolǵany qýantty. Grant ıegeri ataný úshin kez kelgen kásipker bıznes negizderin úsh kúndik kýrs arqyly meńgerip, óz jobasyn usynýy kerek bolǵan. Sonymen qatar, shotynda grant kóleminiń 10 paıyzyna para par qarjy jatýy kerek. Bul qarjy jyljymaıtyn múlik pen jer ýchaskesin, daıyn ónim satyp alýǵa berilmeıdi. Oblys ákimi Danıal Ahmetov óńirde shaǵyn bıznesti damytý úshin jyl saıyn grant mólsherin arttyryp keledi. Byltyr tek 9 grant qana berilgen bolatyn», - deıdi oblystyq kásipkerlik jáne ındýstrııalyq-ınnovatsııalyq damý basqarmasynyń basshysy Maqsat Músápirbekov.
Grantqa usynylaǵan bıznes-jobalardyń ishinde eshki sútin óndirý, shubat óńdeý, tabıǵı shyryn syǵymdaý, defektologııalyq ortalyq ashý sııaqty erekshe ıdeıalar da bolǵan.
Grant ıegerleri alǵan aqshasyn bıznes-jobaǵa salǵany jóninde 6 aı saıyn esep berip otyrýǵa mindetteledi. Al bir jyldan keıin naqty ónimderin kórsetýi tıis. Mundaı granttar óńirde 8 jyldan beri berilip keledi. Buǵan deıin onyń jyldyq kólemi 15-18 mln teńge kóleminde ǵana bolǵan.
Aıta keteıik, ShQO ákimdigi shaǵyn jáne orta bıznes nysandaryn nesıelendirý jáne qarjylaı qoldaý kórsetkishteri boıynsha sońǵy 3 jylda oblystar arasynda aldyńǵy orynda keledi.
