ShQO-da bıylǵy jylytý maýsymynda órtten kóz jumǵandar 16% artty
ShQO TJD baspasóz qyzmetiniń málimetinshe, oblys boıynsha bıylǵy jylytý maýsymy bastalǵaly beri jeke turǵyn úı sektorynda 181 órt shyqqan. Bul ótken jylǵy kezeńmen salystyrǵanda 2,1%-ǵa az.
«Alaıda tilsiz jaýdan adam ólimi 16%-ǵa artyp otyr. 50% jaǵdaıda qaza bolǵandar alkogoldi ishimdik iship, órt shyqqanda syrtqa shyǵyp úlgermegen. Abyroı bolǵanda, órtten bala ólimi bolǵan joq», - delingen aqparatta.
Kómirtegi totyǵynan ýlanǵandar sany 37%-ǵa ósti. Jazataıym oqıǵalardyń negizgi sebepteri - pesh paıdalaný kezinde órt qaýipsizdigi talaptaryn saqtamaý, peshtegi jaryqtar jáne bitelgen murja.
«Órttiń aldyn alý úshin TJD mamandary jeke turǵyn úı sektorynda reıd júrgizip, 160 000-nan astam aýlany aralap shyqty. Nátıjesinde, 40 012 úıde 42 820 órt qaýipsizdigi talaptarynyń buzylýy anyqtaldy. Buzýshylyqtardyń kóbisi jylytý júıelerin, elektr jelileri men elektr jabdyqtaryn durys paıdalanbaýǵa baılanysty», - delingen habarlamada.