ShQO-da bıylǵy oqý jylynda muǵalimniń júktemesi 2 saǵatqa azaıady
Jıyn barysynda ótken oqý jylynyń qorytyndylary talqylanyp, aldaǵy oqý kezeńindegi negizgi mindetter aıqyndaldy.
«Oblysta 796 balabaqsha men shaǵyn ortalyq bar. 3-6 jas aralyǵyndaǵy búldirshinderdi mektepke deıingi bilimmen qamtý kórsetkishi 100%. Jyl basynan beri 5 balabaqsha iske qosylǵan. Orta bilimge qatysty aıtar bolsaq, óńirde 193 553 oqýshy bilim alyp, 24 045 pedagog jumys isteıtin 647 mektep bar. Barlyq bilim ordalary oqýshylardy qabyldaýǵa daıyn. Birinshi synypqa baratyn balalar úshin dástúrli túrde alǵashqy qońyraý soǵylady», - dedi ShQO Bilim basqarmasynyń basshysy Saırangúl Jumadilova.
Barlyq mektepter sanıtarlyq-epıdemıologııalyq talaptardy saqtaı otyryp, oqytýdyń ártúrli formatyna (dástúrli, aralas, qashyqtan) kirisýge ázir. 1 qyrkúıekte 2-11 synyptarǵa QR Táýelsizdiginiń 30 jyldyǵyna arnalǵan «Táýelsizdiktiń jetistikteri» taqyrybynda biryńǵaı synyp saǵaty ótkizilmek.
«Muǵalimderdiń júktemesi 18-den 16 saǵatqa deıin tómendeıdi. Al sabaqtyń uzaqtyǵy 45 mınýt bolady. Barlyq bilim berý uıymdarynda tsıfrlyq platformalarǵa qoljetimdilik qamtamasyz etiledi. Mysaly, 1-11 synyp oqýshylary Bilim jáne ǵylym mınıstrligi usynǵan mazmundy platformalardy paıdalanatyn bolady», - dedi Saırangúl Jumadilova.
Konferentsııa barysynda pandemııa kezinde kórsetken qoldaýy úshin oqý oryndarynyń áleýmettik seriktesteri, 2020-2021 oqý jylynda joǵary nátıjelerge qol jetkizgen pedagogtar, stýdentter men oqýshylar oblys ákiminiń Alǵys hattarymen marapattaldy.