ShQO-da bıyl jol apatynan mert bolǵandar sany artty
ÓSKEMEN. QazAqparat – Shyǵys Qazaqstan oblysynda bıyl jol apatynan mert bolǵandar sany artty, dep habarlaıdy QazAqparat tilshisi.
ShQO Polıtsııa departamentiniń málimetine súıensek, jyl basynan beri óńir joldarynda bolǵan jol-kólik oqıǵalarynan 120 adam kóz jumǵan. Bul ótken jylmen salystyrǵanda birshama kóp.
Polıtseıler adam ólimine ákeletin jol apattarynyń jıilep ketkenine oraı, túsindirý jumystaryn kúsheıtip, júrgizýshilerge qys kezinde jol erejesin qatań saqtaý qajettigin eskertýde.
«Ótken jyly jol-kólik oqıǵalarynan 102 adam jan tapsyrǵan. Bıyl joldaǵy apat azaıǵanymen, mert bolǵandar sany ósip otyr. Qazir oblysta respýblıkalyq «Qaýipsiz jol» jedel aldyn alý sharasy júrgizilýde. Sonyń aıasynda oblystyń qalalary men aýdandarynda polıtsııa kezekshiligi kúsheıtilgen», - dedi ShQO PD Ákimshilik polıtsııa basqarmasy bastyǵynyń orynbasary Erkin Ánýarbekov.
