ShQO-da bıyl jaıaý júrginshiler jolaǵynan ótip bara jatqan 23 balany kólik qaqqan
ÓSKEMEN. QazAqparat – Shyǵys Qazaqstan oblysynda 2021 jyldyń basynan beri jaıaý júrginshiler jolaǵynan ótip bara jatqan 23 balany kólik qaqqan, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, óńir boıynsha jol apatynan jaraqat alyp jatqan oqýshylar az emes.
Bıyldyń ózinde jaıaý júrginshiler jolaǵynan ótip bara jatqan 23 balany kólik qaǵyp, onyń bireýi kóz jumǵan.
Osyǵan oraı tártip saqshylary «Qaýipsiz jol» jedel aldyn alý sharasy aıasynda mektep oqýshylarymen birlesip, jyljymaly fotokórme uıymdastyrdy.
«Óskemen qalasynyń ortalyq kóshelerinde kólik júrgizýshileri men jaıaý júrginshilerge jol qozǵalysynda qaýipsizdik erejelerin qatań saqtaý qajettigi túsindirildi. Bul maqsattaǵy jumystar aldaǵy ýaqytta da jalǵasyn tappaq», - dep habarlady vedomstvo ókilderi.
Aıta keteıik, óńir boıynsha «Qaýipsiz jol» jedel aldyn alý sharasy 20 mamyrda bastalǵan.
