ShQO-da bıyl tótenshe jaǵdaıdan kóz jumǵandar sany 29 paıyzǵa azaıdy

ÓSKEMEN. QazAqparat – Shyǵys Qazaqstan oblysy jurtshylyǵymen kezdesken tótenshe jaǵdaılar vıtse-mınıstri Marat Kúldikov óńirde bıyl túrli tótenshe jaǵdaı kezinde kóz jumǵandar sany 28,9%-ǵa azaıǵanyn aıtty, dep habarlaıdy QazAqparat tilshisi.

«Qutqarýshylar sý jáne sel tasqyny, jer silkinisi qaýpin azaıtý, órtterdiń, óndiristik nysandardaǵy apattardyń aldyn alý maqsatynda turaqty túrde is-sharalar keshenin júrgizedi. Sonyń nátıjesinde bıyl Shyǵys Qazaqstan oblysynda túrli tótenshe jaǵdaı kezinde qaza bolǵandar sany 28,9%-ǵa azaıyp otyr. Jalpy óńir boıynsha 1 100-den astam tótenshe jaǵdaı tirkelgen», - dedi Marat Kúldikov.

Onyń aıtýynsha, ShQO TJD qyzmetkerleri 6 myńnan astam márte kómekke attanyp, 1 052 adamdy qutqardy.

«Búginde oblysta 33 órt sóndirý bólimshesi bar. Biraq bul osyndaı úlken aımaq úshin jetkiliksiz. Sondyqtan taǵy 5 bólimshe qurý qajet. Olardyń qajetti tehnıkamen qamtamasyz etilýi de óte mańyzdy. Qazirgi ýaqytta osy bólimshelerde ártúrli maqsattaǵy 245 tehnıka bar», - dedi QR TJ vıtse-mınıstri Marat Kúldikov.

Eske salsaq, osyǵan deıin ShQO-daǵy 59 eldi mekende sý basý qaýpi joıylǵany habarlanǵan.