ShQO-da bıyl skrınıngtik zertteýden 5 myńnan astam adam ótti

ÓSKEMEN. QazAqparat – Shyǵys Qazaqstan oblysynda bıyl skrınıngtik zertteýden bes myńnan astam adam ótti , dep habarlaıdy QazAqparat tilshisi.

«Áleýmettik medıtsınalyq saqtandyrý qory» ShQO fılıaly baspasóz qyzmetiniń málimetinshe, skrınıngtik zertteýler obyr derti, qant dıabeti jáne glaýkoma syndy aýrýlardy erte kezeńde anyqtaýǵa múmkindik beredi.

«Aýrýdyń aldyn alýdaǵy eń mańyzdy ádis – ol skrınıng. Bıyl óńir boıynsha 5 600 adam osyndaı tekserýden ótken. Skrınıng kabınetteri barlyq emhanalarda bar. Zertteýler tegin medıtsınalyq kómektiń kepildik berilgen kólemi sheńberinde jáne áleýmettik medıtsınalyq saqtandyrý aıasynda jasalady», - dedi fılıal dırektory Ǵalymjan Ábilov.

Ár adam skrınıngten ótýge jas shamasy keletinin nemese kelmeıtinin ózi tirkelgen emhanadan bile alady.

«Jyl basynan beri qor dál osy maqsatqa 575 mln teńge qarjy qarastyrdy. Skrınıngten bári ótý kerek. Tipti eger densaýlyǵyńyzǵa esh shaǵymyńyz bolmasa da. Árkim óz densaýlyǵyna ózi jaýapty. Osy rette aıta ketetin jaıt, skrınıgten ótý kezinde jumys berýshi qolastyndaǵy qyzmetkerdi jumystan úsh kúnge deıin bosatýy tıis. Sol kúnderge jumysshynyń jalaqasy saqtalady», - dedi Ǵ.Ábilov.

Eger qosymsha suraqtar týyndasa áleýmettik medıtsınalyq saqtandyrý qoryna fms.kz resmı saıty, 1406 baılanys ortalyǵy, Qoldau 24/7 mobıldi qosymshasy jáne Telegram-daǵy SaqtandyryBot arqyly júginýge bolady.