ShQO-da bıyl órtten qaza bolǵandar sany 46 paıyzǵa azaıdy

ÓSKEMEN. QazAqparat – Shyǵys Qazaqstan oblysynda bıyl jer úılerde órtten qaza bolǵandar sany 46% kemigen, dep habarlaıdy QazAqparat tilshisi.

ShQO TJD baspasóz qyzmetiniń málimetine súıensek, oblys ákiminiń orynbasary Nurjan Jumadilovtyń tóraǵalyǵymen tótenshe jaǵdaılar jónindegi komıssııanyń kezekti otyrysy ótti.

Talqyǵa salynǵan birinshi másele – turǵyn úı sektoryndaǵy jylytý maýsymynyń qorytyndysy boldy.

Memlekettik órt baqylaý basqarmasy bastyǵynyń orynbasary Nurjan Ómirjanovtyń aıtýynsha, óńirde 463 ret órt shyqqan.

Bul ótken jylǵy kezeńmen salystyrǵanda 24%-ǵa az. Sondaı-aq órtten qaza bolǵandar sany 46%-ǵa azaıdy.

«Qutqarýshylar 486 205 aýlany aralap, 743 639 turǵynǵa órt qaýipsizdigi erejelerin túsindirdi. Tekserý barysynda peshterge, elektr symdaryna, evakýatsııalaný joldaryna baılanysty 120 984 buzýshylyq anyqtaldy. Onyń ishinde 19 501 buzýshylyq sol jerde joıyldy», - dedi ol.

Halyqtyń áleýmettik osal toptaryna erekshe nazar aýdarylǵan.

Jylytý kezeńinde azamattyq qorǵaý organdarynyń qyzmetkerleri jergilikti atqarýshy organ ókilderimen birlesip osy sanattaǵy azamattar arasynda profılaktıkalyq tekserý júrgizdi.

Olardyń úıine ýly gazdy anyqtaıtyn 1813 datchık ornatylǵan.

ShQO Tabıǵı resýrstar jáne tabıǵat paıdalanýdy retteý basqarmasynyń basshysy Marat Qusaıynovtyń sózinshe, búginde oblys aýmaǵynda orman órtterin jyldam aýyzdyqtaý úshin 106 tehnıka jáne 3400-den astam órtke qarsy qural-jabdyq daıyn tur.