ShQO-da bıyl órt qaýipsizdiginiń saqtalmaýynan 80-nen astam jer úıdi ot sharpydy
ÓSKEMEN. QazAqparat – Shyǵys Qazaqstan oblysy Shemonaıha aýdanynda órt sóndirýshiler 120 sharshy metrge jaıylǵan tilsiz jaýdy aýyzdyqtady, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 6 tamyzda túngi saǵat 01.38-de Shemonaıha qalasy Gorkıı kóshesindegi jeke turǵyn úı aýlasynda órt shyqqan.
«Oqıǵa ornyna shuǵyl jetken qutqarýshylar 2 qojaıynǵa tıesili sharýashylyq qora-jaılardyń otqa oranǵanyn kórdi. Órt sóndirýshiler jalyndy aýyzdyqtap, onyń ary qaraı taralýyna jol bermedi. Tilsiz jaýdyń jalpy aýdany 120 sharshy metrdi quraǵan», - delingen habarlamada.
Aldyn ala málimet boıynsha ottyń shyǵý sebebi - elektr jabdyqtaryn montajdaý men paıdalaný kezinde órt qaýipsizdigi erejeleriniń saqtalmaýynan.
Osy sebeppen oblysta jyl basynan beri jeke turǵyn úı sektorynda 81 ret órt bolǵan.
